✒️कुरखेडा(पुरोगामी न्यूज नेटवर्क)
कुरखेडा(दि.18मार्च):-१५ मार्च जागतिक ग्राहक दिनाचे औचित्य साधून गडचिरोली येथे शिवाजी महाविद्यालय सभागृहात ग्राहक पंचायत महाराष्ट्र, आंतरराष्ट्रीय मानवाधिकार प्रशासन शाखा गडचिरोली शिवाजी महाविद्यालय, कनिष्ठ विज्ञान महाविद्यालय गोकुळनगर यांच्या संयुक्त विद्यमाने “ग्राहक मित्र गौरव पुरस्काराचे आयोजन करण्यात आले होते.
” या भव्य अशा कार्यक्रमाचे मुख्य आयोजक अरूण पाटील मुनघाटे तसेच त्यांच्या टिमने केले होते. मूळ गाव देऊळगाव येतील व सध्या कुरखेडा येथे वास्तव्यास असणाऱ्या साहित्यिक, सामाजिक कार्यकर्त्या, संगीता संतोष ठलाल यांची दैनंदिन साहित्य सेवा सोबतच नि:स्वार्थ सामाजिक कार्य बघून, एवढेच नाही तर मानवी जीवनासाठी तसेच मुक्या पशूंसाठी साहित्य क्षेत्रातील असा एकमेव पहिला संशोधन “ग्रंथ रानभाज्यांच्या जगात” लिहून त्यांनी समाजासाठी फार मोठे समाजजागृतीचे कार्य केले आहेत. हेच त्यांचे समाजासाठी भरीव असलेले योगदानाबद्दल अरूण पाटील मुनघाटे यांनी संगीता ठलाल यांना फोन करून या पुरस्काराबद्दल निवड करण्यात आली असे कळवले होते.
भव्य अशा कार्यक्रमात मान्यवरांच्या हस्ते संगीता ठलाल यांना “ग्राहक मित्र गौरव पुरस्कार” देऊन सन्मानित करण्यात आले. अतिशय मानाचा पुरस्कार मानल्या गेलेल्या या पुरस्काराबद्दल सामाजिक कार्यकर्त्या संगीता ठलाल यांनी आपल्या मनोगतातून बोलताना म्हणाल्या की, समाजात असे कितीतरी लोक नि:स्वार्थ भावनेने,कशाचीही अपेक्षा न करता कार्य करत असतात पण,त्यांची दखल घेतली जात नाही. पण,आजही मा.अरूण पाटील मुनघाटे सरांसारखे व्यक्तीमत्व तळागाळातील कार्यकर्त्यांचा शोध घेऊन त्यांची दखल घेतात आणि समाजात त्यांची ओळख निर्माण करून देतात.
सोबतच “रानभाज्यांच्या जगात” या संशोधन ग्रंथावर सुद्धा त्यांनी आपले मनोगत व्यक्त केले आणि मुख्य आयोजक मा. अरूण पाटील मुनघाटे आणि त्यांच्या संपूर्ण टिमचे आभार मानले. आणि सर्व पुरस्कार विजेत्यांना सुद्धा शुभेच्छा दिल्या. त्या शुभ प्रसंगी मंचावर उपस्थित असलेले प्रविण घाटे, कार्यक्रमाच्या अध्यक्ष प्रतिभा पाटील, उद्घाटक माधुरी आटमांडे , रुपचंद फुलझेले,गोंविदराव बानबले,शरद पाटील ब्राह्मणवाडे, अरूण पाटील मुनघाटे,चंद्रशेखर भडांगे, कमलेश तुमसरे सोबतच सभागृहात, विविध क्षेत्रातील मान्यवर, शिवाजी महाविद्यालयातील कर्मचारी बहुसंख्येने उपस्थित होते.
