✒️गंगाखेड प्रतिनिधी(अनिल साळवे)मो:-8698566515
गंगाखेड(दि.29मे):-देशभरात खळबळ उडवणाऱ्या NEET परीक्षेच्या पेपरफुटी प्रकरणामुळे लाखो विद्यार्थ्यांचे भवितव्य धोक्यात आले असून, पालक, विद्यार्थी व शिक्षण क्षेत्रातून तीव्र संताप व्यक्त होत आहे. मात्र या गंभीर आणि संवेदनशील विषयावर मराठवाडा शिक्षक मतदारसंघाचे आमदार सतीश चव्हाण आणि मराठवाडा पदवीधर मतदारसंघाचे आमदार विक्रम काळे यांचे दीर्घ मौन अनेकांना धक्कादायक वाटत आहे.
NEET ही परीक्षा केवळ एक स्पर्धा नसून, लाखो विद्यार्थ्यांच्या कष्टांचे, पालकांच्या अपेक्षांचे आणि संपूर्ण शिक्षण व्यवस्थेच्या विश्वासाचे प्रतीक आहे. अशा परीक्षेचा पेपर फुटणे म्हणजे केवळ परीक्षा व्यवस्थेचे अपयश नव्हे, तर गुणवत्तेवर आणि न्यायावर झालेला घाला असल्याची भावना सर्वत्र व्यक्त होत आहे. या पार्श्वभूमीवर राज्यातील सर्वच पदवीधर व शिक्षक आमदारांनी एकत्रितपणे आक्रमक भूमिका घेऊन आवाज उठवणे अपेक्षित असताना, मराठवाड्याचे प्रतिनिधित्व करणाऱ्या आमदारांचे मौन अधिकच खटकत आहे.
शिक्षक व पदवीधर मतदारसंघातून निवडून आलेले लोकप्रतिनिधी हे शिक्षण व्यवस्थेचे थेट प्रतिनिधी मानले जातात. त्यामुळे अशा गंभीर प्रकरणात त्यांनी विधानसभेत, शासनदरबारी आणि सार्वजनिक पातळीवर ठोस भूमिका मांडावी, दोषींवर कठोर कारवाईची मागणी करावी, तसेच परीक्षा प्रणालीत तातडीच्या सुधारणा सुचवाव्यात, अशी अपेक्षा शिक्षक व पदवीधर वर्गातून व्यक्त होत आहे.
पालकवर्गातही तीव्र नाराजी दिसून येत असून, “विद्यार्थ्यांचे भविष्य धोक्यात आले असताना आमदार गप्प का?” असा थेट सवाल विचारला जात आहे. पेपरफुटीमुळे प्रामाणिक विद्यार्थ्यांवर अन्याय झाला असून, अशा प्रकारांना आळा बसण्यासाठी कायद्याची कठोर अंमलबजावणी, पारदर्शक परीक्षा प्रक्रिया आणि जबाबदार यंत्रणा उभारण्याची गरज अधोरेखित केली जात आहे.
या प्रकरणावर आमदारांनी तातडीने मौन सोडून आक्रमक, ठोस आणि स्पष्ट भूमिका घ्यावी, अशी मागणी मराठवाड्यातील शिक्षक, पदवीधर, पालक व विद्यार्थ्यांकडून होत आहे. अन्यथा, हे मौन म्हणजे अन्यायाला मूक संमती असल्याचा आरोप अधिक तीव्र होण्याची शक्यता व्यक्त केली जात आहे.
