▪️एसएनडीटीच्या लीलाबाई ठाकरेसी कॉलेज ऑफ नर्सिंगमध्ये ७४वा कॅन्डल लाइटिंग व पदवीदान सोहळा उत्साहात संपन्न
✒️मुंबई(पुरोगामी न्यूज नेटवर्क)
मुंबई(दि.22फेब्रुवारी):-“वैद्यकीय क्षेत्रात डॉक्टर आणि रुग्ण यांच्यातील सर्वात मजबूत भिंत किंवा आधारस्तंभ म्हणजे परिचारिका होय. तिचे समर्पण आणि सेवाभाव हाच आरोग्यव्यवस्थेचा कणा आहे,” असे गौरवपूर्ण उद्गार मान्यवरांनी काढले. निमित्त होते, एसएनडीटी महिला विद्यापीठांतर्गत असलेल्या लीलाबाई ठाकरेसी कॉलेज ऑफ नर्सिंगच्या ७४व्या कॅन्डल लाइटिंग आणि पदवीदान समारंभाचे.
बुधवार, १८ फेब्रुवारी २०२६ रोजी चर्चगेट येथील सर सीताराम व लेडी शांताबाई पाटकर दीक्षांत सभागृहात हा दिमाखदार सोहळा पार पडला. १९५२ साली स्थापन झालेले हे महाविद्यालय महाराष्ट्रातील पहिले नर्सिंग महाविद्यालय असून, महिला सक्षमीकरण आणि गुणवत्तापूर्ण नर्सिंग शिक्षणात या संस्थेचा मोठा वाटा आहे.
उपमुख्यमंत्र्यांच्या शुभेच्छा आणि मान्यवरांची उपस्थिती
या सोहळ्यासाठी महाराष्ट्राचे उपमुख्यमंत्री मा. श्री. एकनाथ शिंदे साहेब यांनी विशेष संदेशाद्वारे आयोजक व नर्सिंग विद्यार्थ्यांचे कौतुक करत त्यांना भावी वाटचालीस शुभेच्छा दिल्या. कार्यक्रमाचे अध्यक्षस्थान एसएनडीटी महिला विद्यापीठाच्या कुलगुरू प्रा. डॉ. उज्वला चक्रदेव यांनी भूषविले. प्रमुख पाहुणे म्हणून पी. डी. हिंदुजा हॉस्पिटलचे क्रिटिकल केअर कन्सल्टंट डॉ. खुशराव बजन उपस्थित होते, तर कुलसचिव डॉ. विलास नंदावडेकर यांची विशेष उपस्थिती लाभली.
नर्सिंग क्षेत्रातील ‘पवित्र’ प्रवेश
कार्यक्रमाची सुरुवात राष्ट्रगीत, महाराष्ट्र गीत आणि विद्यापीठ गीताने झाली. त्यानंतर पारंपारिक दीपप्रज्वलन आणि ‘कॅन्डल लाइटिंग’ (नर्सिंग शपथविधी) सोहळा पार पडला. हातात मेणबत्ती घेऊन घेतलेली ही प्रतिज्ञा विद्यार्थिनींच्या सेवाभावी आयुष्याची खऱ्या अर्थाने सुरुवात ठरली. प्राचार्या डॉ. शोभा गायकवाड यांनी महाविद्यालयाचा वार्षिक अहवाल सादर करताना शैक्षणिक प्रगती आणि संशोधनातील योगदानाचा आढावा घेतला.
मान्यवरांचे प्रेरणादायी विचार
डॉ. उज्वला चक्रदेव: परिचारिकांच्या वाट्याला येणारे कष्ट आणि त्यांची सहनशीलता ही समाजासाठी अमूल्य आहे. त्यांनी परिचारिकांच्या समर्पणाचे कौतुक केले.
डॉ. विलास नंदावडेकर: परिचारिकांनी आता केवळ क्लिनिकल सेवेपुरते मर्यादित न राहता शैक्षणिक आणि संशोधन क्षेत्रातही आपली मोहोर उमटवावी, असा नवा दृष्टिकोन त्यांनी मांडला.
डॉ. खुशराव बजन: आरोग्यसेवेत व्यावसायिक जबाबदारीसोबतच करुणा आणि नैतिक मूल्यांची जपणूक करणे काळाची गरज असल्याचे त्यांनी अधोरेखित केले.
या सोहळ्यामुळे नर्सिंग क्षेत्रात पाऊल ठेवणाऱ्या नवोदित नर्सिंग विद्यार्थ्यांमध्ये उत्साहाचे वातावरण होते. कुशल, संवेदनशील आणि सामाजिकदृष्ट्या जबाबदार परिचारिका घडविण्याच्या ध्येयाची प्रचिती या कार्यक्रमातून आली अशी माहिती अनिल जायभाये बीडकर यांनी दिली.
