तेरा ऑगस्टला । आज स्मृतिदिनी ।
वंदन करांनी । कोटी कोटी ॥
सुशीला मातोश्री । मानकोजी पिता ।
पेटविल्या वाता । विकासाच्या ॥
मुक्ताबाई लेक । पती खंडेराव ।
पुत्र मालेगाव । परिवार ॥
चौंडी ग्राम नाम । दूर पोहोचले ।
कर्तृत्व गाजले । भारतात ॥
येताच वैधव्य | नाही गेल्या सती ।
जुळविली नाती । जनतेशी ॥
सम्राज्ञी महान । माळवा प्रांताची ।
मल्हाररावांची । क्रांती स्नुषा ॥
अहिल्याबाई ही । एक महाराणी ।
एक राजधानी । महेश्वर ॥
राजधानी मध्ये । जन घडविले ।
नाम थोर केले । होळकर ॥
मानलाच नाही । जाती धर्म भेद
सर्वांनाच छेद । कर्मातून ॥
शेतकरी राजा । झाला पूर्ण सुखी ।
कोणीच ना दुःखी । करमुक्ती ॥
तलाव विहिरी । बांधुनिया दिले ।
आनंदित केले । शेतकरी ॥
न्यायदान देवी । पुण्यश्लोक राणी ।
गाऊ कर्म गाणी । अहिल्येची ॥
दरोडेखोरांना । आश्रय देऊन l
सु-परिवर्तन । घडविले ॥
थोर महाराणी । सम्यक कर्मांत ।
प्रजा आनंदात । जीवनात ॥
जनतेची राणी । थोर तपस्विनी ।
एक तेजस्विनी । अहिल्याच ॥
अहिल्यादेवींच्या । कार्याला नमन ।
करितो वंदन । कोटी कोटी ॥
संत कबीर कविराज
राज्यस्तरीय पुरस्कार प्राप्त
अभंगकार
✒️प्रा.अरुण बाबारावजी बुंदेले,रुक्मिणी नगर,अमरावती .भ्र.ध्व. :-८०८७७४८६०९
