जिंतूर (प्रतिनिधी-सौ. अश्विनी जोशी) तालुक्यातील सर्व शाळांमध्ये दिनांक 21 जून 2024 रोजी दहावा आंतरराष्ट्रीय योग दिन उत्साहात साजरा करण्यात आला. निरोगी आणि आरोग्य संपन्न जीवन जगण्यासाठी नियमित योग करण्याची आवश्यकता आहे. “योगाचा ध्यास धरू आरोग्याची कास धरू…..” योग केल्यामुळे अनेक आजारापासून दूर राहता येते. यासोबतच काही आजारावर योग पद्धती हा प्रभावी उपचार आहे. या सर्व बाबींचा विचार करून योगाचे महत्त्व जनसामान्यांना माहिती होणे अत्यंत महत्त्वाचे आहे. या दृष्टीने मागील दहा वर्षापासून संपूर्ण देशभरामध्ये योग दिन साजरा केला जात आहे. वरिष्ठ कार्यालयाच्या सूचनेनुसार याही वर्षी दहावा आंतरराष्ट्रीय योग दिन साजरा करण्यात येत आहे.
त्यानुसार योगाचे महत्व प्रचार आणि प्रसार करण्याच्या हेतूने तालुक्यातील सर्व शाळेमध्ये सकाळी 7 ते 9 या वेळेमध्ये योग प्रात्यक्षिकांचे यशस्वी आयोजन करण्यात आले. यामध्ये विविध प्रकारचे व्यायाम प्रकार, योगासने, प्राणायाम घेण्यात आले.
या अनुषंगाने गटशिक्षणाधिकारी त्र्यंबक पोले यांनी स्वतः मालेगाव व पाचलेगाव येथे योग प्रात्यक्षिकामध्ये सहभाग नोंदवला. योग दैनंदिन अभ्यास आणि एकंदरीत जीवन या विषयी मार्गदर्शन केले. जीवनामध्ये चांगल्या सवयी अत्यंत महत्त्वाच्या आहेत. यासोबत प्रत्येक बालकाने आपले आई-वडील, आजी-आजोबा, आपले गुरुजन आणि ज्येष्ठ-वरिष्ठ यांचा आदर केला पाहिजे. त्यांनी सांगितलेल्या बाबी समजून घेतल्या पाहिजेत. त्यांच्या अनुभव संपन्न ज्ञानाने आपले जीवन समृद्ध केले पाहिजे.
ज्येष्ठ शिक्षण विस्तार अधिकारी ज्ञानोबा साबळे व मंगेश नरवाडे यांच्यासह सर्व केंद्रप्रमुख, सर्व साधनव्यक्ती यांनी विविध शाळेमध्ये योग शिबिरात सहभाग नोंदवला.
